Əbdürrəhim bəy Haqverdiyev Azərbaycan ədəbiyyatının görkəmli simalarından biri olmuşdur. O, yazıçı, dramaturq, ictimai-siyasi və teatr xadimi, pedaqoq və ədəbiyyatşünas kimi fəaliyyət göstərmişdir. 1870-ci ildə Şuşa yaxınlığındakı Ağbulaq kəndində anadan olmuşdur.
Ə.Haqverdiyev Azərbaycan teatrının inkişafında mühüm rol oynamış, “Leyli və Məcnun” operasının premyerasında ilk dirijor olmuşdur. O, həmçinin “Molla Nəsrəddin” jurnalının yazarlarından biri olmuş və Birinci Rus Dumasının Azərbaycandan deputatı kimi siyasi fəaliyyət göstərmişdir. Əsərlərində dövrün sosial və mənəvi problemlərini əks etdirmiş, maarifçilik ideyalarının yayılmasına töhfə vermişdir.
Əsərləri arasında “Dağılan tifaq”, “Ac həriflər”, “Bəxtsiz cavan”, “Pəri cadu”, “Marallarım”, “Xortdanın cəhənnəm məktubları”, “Ağa Məhəmməd şah Qacar”, “Fərman və Gövhərtac”, “Vaveyla” kimi nəhəng sənət nümunələri xüsusi yer tutur. Ədibin pyeslərində insan xarakterlərinin açılması və satirik dil xüsusilə diqqət çəkir. Onun əsərlərində dövrün sosial və mənəvi problemləri əks olunmuş, milli məişət həyatının tənqidi təsviri ön plana çıxmışdır.
Görkəmli şəxsiyyət həmçinin Azərbaycan ədəbi dilinin inkişafına mühüm töhfələr vermişdir. O, dil məsələləri ilə bağlı məqalələr yazmış, ədəbi dilin formalaşması və saflığının qorunması üçün mübarizə aparmışdır.
Ə.Haqverdiyev həmçinin klassik Şərq və Qərb ədəbiyyatından tərcümələr etmiş və dramaturgiyanın inkişafında xüsusi rol oynamışdır.
Ədəbi tənqid sahəsində də fəal olmuş, “Tənqidə tənqid” adlı məqaləsində sənət və yaradıcılıq azadlığı mövzusunda dərin düşüncələrini bölüşmüşdür. Onun ədəbi görüşləri Azərbaycan realist ədəbiyyatının inkişafına təsir etmiş və bir çox yazıçılar üçün ilham mənbəyi olmuşdur.
Əbdürrəhim bəy Haqverdiyev Azərbaycanın ictimai-siyasi həyatında da mühüm rol oynamışdır. Birinci Rus Dumasının Azərbaycandan deputatı kimi fəaliyyət göstərən və müsəlmanların hüquqlarının müdafiəsi ilə fəal şəkildə məşğul olan, Haqverdiyev həmçinin Gürcüstan Parlamentinin deputatı kimi də çalışmışdır. Siyasi fəaliyyətində o, maarifçilik ideyalarını ön plana çıxarmış, mətbuatda çıxışlar etmiş və dövrün aktual problemlərinə toxunmuşdur. “Molla Nəsrəddin” jurnalının yazarlarından biri kimi ictimai-siyasi mövzulara dair yazılar yazmış və satirik üslubda cəmiyyətin problemlərini tənqid etmişdir.
Əbdürrəhim bəy Haqıverdiyev 11 dekabr 1933-cü ildə Bakıda vəfat etmişdir. Ə.Haqverdiyev Fəxri Xiyabanda dəfn olunmuşdur.
