Ölkəmizdə ilk dəfə Uşaq Kitab Festivalı keçirildi

2-3 aprel tarixlərində ölkəmizdə ilk dəfə olaraq Azərbaycan Nəşriyyatları Assosiasiyasının təşkilatçılığı ilə I Uşaq Kitab Festivalı keçirildi. 2 gün ərzində 20 minə yaxın ziyarətçi Festivalın qonağı oldu. Çeşid-çeşid kitabların endirimli satışı, kitab təqdimatları, yazıçılarla görüşlər, nağıl qəhrəmanlarının sərgüzəştləri, teatr tamaşaları və bir-birindən maraqlı proqramlar uşaqların üzünə təbəssüm, qəlbinə sevinc bəxş etdi. Müxtəlif məktəblərdən yüzlərlə şagird sərginin qonağı oldu, sevimli yazıçıları ilə görüşüb, kitab imzalatdırdılar. Zahid Xəlil, Reyhan Yusifqızı, Gülzar İbrahimova, Vüqar Haqverdiyev, Şəmil Sadiq və digər yazıçılar oxucuları ilə görüşüb, kitab və mütaliə ilə bağlı fikir və təəssüratlarını paylaşdılar. Türkiyədən qonaq gəlmiş tanınmış uşaq yazarı Suat Turqut uşaqlara nağıl və hekayələrini anladıb, onlara sevincli anlar bəxş etdi.
Green Start Academy olaraq biz də övladlarımızla birlikdə I Uşaq Kitab Festivalında iştirak edərək, bu möhtəşəm kitab bayramından böyük zövq aldıq və bu cür görüşlərin davamlı olmasını arzuladıq.