Azərbaycan Respublikası müstəqillik əldə etdikdən sonra məhz ulu öndər Heydər Əliyevin ekologiya və ətraf mühitin mühafizəsi sahəsinə qayğıkeş münasibəti nəticəsində onun imzaladığı 23 may 2001-ci il tarixli Sərəncamla Ekologiya və Təbii Sərvətlər Nazirliyi yaradılmışdır.
Ekologiya və Təbii Sərvətlər Nazirliyi Azərbaycan Respublikası ərazisində, o cümlədən Xəzər dənizinin (gölünün) Azərbaycan Respublikasına mənsub olan bölməsində ətraf mühitin qorunması, təbiətdən istifadənin təşkili, yeraltı sulardan, mineral xammal ehtiyatlarından və yerüstü təbii sərvətlərdən səmərəli istifadə edilməsi, onların bərpası, hidrometeoroloji proseslərin müşahidəsi və proqnozlaşdırılması sahəsində dövlət siyasətini həyata keçirən mərkəzi icra hakimiyyəti orqanıdır.
Hər il ölkəmizdə 23 may tarixi, Azərbaycan Respublikası Prezidenti cənab İlham Əliyevin 16 may 2007-ci il tarixində imzaladığı sərəncama uyğun olaraq Ekologiya və Təbii Sərvətlər Nazirliyi işçilərinin peşə bayramı kimi qeyd olunur.
Ekologiya və Təbii Sərvətlər Nazirliyi işçilərini bu əlamətdar gün münasibətilə ürəkdən təbrik edirik. Ekoloji cəhətdən ətraf mühitin qayğısını çəkmək, təbii sərvətlərimizin qorunması istiqamətində bir çox mühüm işlər görmək olduqca çətin zəhmət tələb edən bir işdir. Nazirliyin bütün əməkdaşlarına bu məsuliyyətli peşələrində uğurlar arzu edirik.
