Məsuliyyətli insan cavabdehlik anlayışını öz şəxsində simvollaşdıran kəsdir…
Əməkdaşlarının daim inkişafını qarşısına məqsəd qoyan Green Start Academy hər ayı bir mövzu əsasında Dəyər ayı elan edir. Bu xüsusda yanvar ayı “Məsuliyyət ayı” elan olundu. Bu mövzu üzərindən məsuliyyətlə bağlı bir çox məqamlara toxunuldu və əməkdaşlar tərəfindən müəyyən tapşırıqlar yerinə yetirildi. “Məsuliyyət ayı” mövzusunun proqramına Antuan De Sent Ekzüperinin “Balaca Şahzadə” əsərini oxumaq, “Power and Responsibility” (“Güc və məsuliyyət”) filminə baxmaq, mövzuyla bağlı atalar sözü, məsəllər, aforizmlər səsləndirmək daxil idi. Həmçinin gündəlik görəcəyimiz işləri qeydə alaraq, günün sonunda icra olunan və ya olunmayan işlərin hesabatını aparmaq, məsuliyyəti həyatımızın əsas hissəsi olaraq gündəlik rutin halına gətirmək və digər insanlara nümunə olmaq kimi müsbət keyfiyyətlər proqramda qeyd edilmişdir.
Proqramın “Öhdəliklər” bölümündə isə işlərin planlı şəkildə icrası, verilən tapşırıqların yerinə yetirilməsi, vaxtdan maksimum dərəcədə səmərəli istifadə olunması nəzərdə tutulmuşdur.
“Məsuliyyət ayı” proqramının “Üstünlüklər” bölümündə “Məsuliyyətli insan modeli” yaratmaq ideyası aylığın əsas prinsipi idi. Lazımsız yerə işləri təxirə salmaq və işə qarşı məsuliyyətsiz yanaşmaqdan çəkinmə hallarına istinadən məhdudiyyətlərin qoyulması mövzunun mahiyyətini açıqlamışdır. Nəzərdə tutulmuş proqram çərçivəsində gündəlik fəaliyyətə nəzarət edilməsi, ən məsuliyyətli əməkdaşın qalib elan olunması düşünülmüş və proqramda göstərilmişdir.
“Məsuliyyət” anlayışı hər bir insanın dərk etməsi vacib olan çox önəmli bir məfhumdur. Həyatda hər bir şəxs öz üzərinə düşən məsuliyyəti dərk etsə, zənnimcə, bir çox problemlərin həlli yolunu tapmış olar.
Mərkəzimizdə təşkil olunan “Məsuliyyət ayı” ilə bağlı mövzunun proqrama daxil edilmiş Antuan De Sent Ekzüperinin “Balaca Şahzadə” əsərini bütün əməkdaşların bu ay çərçivəsində oxuması əsaslandırılaraq, həmçinin əsərdəki məsuliyyətliliklə bağlı çox önəmli məqamların burada qeyd edilməsi və hər bir şəxsin bundan nümunə götürməsi mühüm səciyyəvi əhəmiyyət kəsb edir. Həqiqətən də Antuan De Sent Ekzüperinin şah əsəri sayılan “Balaca Şahzadə” Mərkəzin bütün əməkdaşları tərəfindən rəğbətlə qarşılandı və sevə-sevə oxundu. Hər kəs ayrı-ayrılıqda özü üçün əsər üzərindən qeydlər apararaq, gündəlik həyat fəaliyyətlərində məsuliyyətliliklə bağlı xeyli informasiyalar qazanaraq, nümunələr götürmüş oldu. Bundan əlavə, hər bir kəs özünəməxsus tərzdə “Məsuliyyət ayı” mövzusu haqqında subyektiv fikirlərini atalar sözləri, məsəllər və aforizmlər əsasında bəyan etdirərək maraqlı təqdimatlar hazırladılar. Hazırlanan təqdimatlar əsasında hər bir əməkdaşa çıxış etmək üçün söz verildi. Əməkdaşlar maraqlı çıxışları ilə mövzu ilə bağlı fikirlərini bölüşdülər. Mövzu ətrafında xoş və geniş müzakirələr aparıldı.
İclasın sonunda Green Start Academy-nin direktoru Aysel Rəsulzadə çıxış edərək mövzuyla əlaqəli fikirlərini bildirdi. Daha sonra isə Aysel xanım hər bir əməkdaşın çıxışını xüsusi dəyərləndirdi. Onların təqdimatlarından sitatlar gətirərək mənfi və müsbət keyfiyyətlərini qeyd etdi.
“Məsləhətin nəticəsi üçün məsuliyyət nəzərdə tutulsa idi, məsləhətçi tapmaq çətin olardı. (Əbu Turxan)
“Məsuliyyətlilik” həyatda ən önəmli və ən vacib faktor olduğundan çalışaq ki, hər zaman gündəlik həyatımızda bu xüsusiyyətə sözdə deyil, əməldə müvəffəq olaq.
