Green Start Academy-nin təşkilatçılığı ilə 15 sentyabr tarixində Azərbaycanda ilk dəfə olaraq Onlayn Bilik Günü keçirildi. Saat 17:00-da başlayan tədbir Green Start Academy-nin sosial şəbəkələrindən canlı yayımlandı. Azərbaycan Respubikasının Dövlət Himninin səsləndirilməsindən sonra tədbir Green Start Academy-nin rəhbəri Aysel Rəsulzadə açıq elan etdi. Aysel Rəsulzadə Green Start Academy-nin məqsəd və vəzifələrindən danışaraq, hər zamankı kimi cəmiyyətin aparıcı qüvvəsi olan, gənc nəslin yetişməsində və şəxsiyyət kimi formalaşmasında vacib rol oynayan təhsil işçilərinin maariflənməsinə xidmət etdiklərini dilə gətirdi.
Açılış nitqindən sonra Azərbaycan Respublikasının Təhsil nazirinin müşaviri Elnur Nəsibov iştirakçıları və digər təhsil ictimaiyyətini Bilik Günü münasibəti ilə təbrik edərək, cənab nazir Emin Əmrullayevin təbrikini də bütün təhsil ictimaiyyətinin nəzərinə çatdırdı. Yeni tədris iliylə bağlı yeniliklərdən söhbət açan Elnur Nəsibov hazırda pandemiya şəraitində təhsilin idarə olunması ilə bağlı Təhsil Nazirliyinin mövqeyini ictimaiyyətə bəyan edərək, digər prioritet məsələlərə toxundu. Nazir müşaviri Green Start Academy-nin fəaliyyətini yüksək qiymətləndirərək, pandemiya dövründə bu tipli tədbirlərin keçirilməsinin vacibliyini qeyd etməklə, təşkilatçılara nəcib fəaliyyətlərindən dolayı təşəkkürünü çatdırdı.
Təhsil Nazirliyi yanında İctimai Şuranın sədri, professor Şahlar Əskərov, Şuranın sədr müavini, təhsil mütəxəssisi Nadir İsrafilov, Azərbaycan Respublikasının Təhsil İnstitunun Təlim nəzəriyyəsi və metodikası şöbəsinin müdiri Bibixanım İbadova, Təhsil İdarəediciləri Assosasiyasının həmtəsisçisi, təhsilin idarə olunması üzrə mütəxəssis Qoşqar Məhərrəmov, təhsil üzrə mütəxəssis Elşən Qafarov, TAM – Teaching Advancement Matrix-in baş direktoru Cəfər Mənsimi, Azərbaycan Dövlət Pedaqoji Universitetinin Filologiya fakültəsinin dekanı Mahirə Hüseynova, Cəbrayıl rayon H.Aslanov adına Cocuq Mərcanlı kənd tam orta məktəbinin direktoru Zamin Həziyev, Əziz Əliyev adına Həkimlərin Təkmilləşmə İnstitutunun Pediatriya kafedrasının dosenti Mətanət Qaraxanova, eyni zamanda orta və ali məktəb müəllimləri yeni tədris ilinin başlanması münasibəti ilə təbrik-çıxışlar etdilər. Green Start Academy-nin əməkdaşları – 22 nömrəli uşaq poliklinikasının həkim-pediatrı Aygün Cəfərli, sağlam qidalanma üzrə mütəxəssis Məhsəti Hüseynova, psixoloq Gülşən Nəhmətova çətin pandemiya şəraitində müəllim və valideynləri daha tədbirli olmağa çağırmaqla, öz tövsiyələrini paylaşdılar.
Bundan başqa Green Start Academy-nin bölgələrdə fəaliyyət göstərən müəllim nümayəndələrinin çalışdıqları təhsil müəssisələrindən Bilik Günü ilə bağlı çəkdikləri videoroliklər tədbirə ayrı bir rəng qatdı. Həmçinin orta məktəb şagirdlərinin məktəb və müəllim haqqında səsləndirdikləri şeirlər hər kəsin marağına səbəb oldu.
Geniş və maraqlı müzakirələrlə əhatə olunan konfrans yüksək əhval-ruhiyyə ilə başa çatdı. Sonda Zakir Yusifov adına 194 nömrəli məktəbin 1-ci sinif şagirdi Mələk Əzimovanın Bilik Gününün rəmzi olan İlk zəngi səsləndirməsi ilə dərs ilinin başlanması elan olundu.
