«Hədəfdə bir gün» layihəsi uğurla təşkil olundu

Green Start Academy-nin yeni tərəfdaşı Hədəf STEAM Liseyinin Nəsimi və Qurtuluş filiallarında 12 mart tarixində “Hədəfdə bir gün” sosial layihəsi çərçivəsində Liseyə bir günlük təhsil turu təşkil olundu. Layihə çərçivəsində 150-yə yaxın dövlət məktəbindən qeydiyyata yazılmış Azərbaycan və rus bölmələri üzrə 1-10-cu sinif şagirdləri olmaqla ümumilikdə 400-ə yaxın şagird iştirak etdi. Səhər saat 08:30-da şagirdlərin foyedə toplaşması ilə başlanan layihə ilkin tanışlıq və səhər yeməyindən sonra sinif otaqlarında müxtəlif fənlərin əyləncəli tədrisi ilə davam etdi. Liseydə gəzinti – Dədə Qorqud otağında söhbət, muzey və laboratoriyaları ilə tanışlıq şagirdlərə çox maraqlı anlar yaşatdı. Dərslərdən əlavə digər məşğuliyyətlərin – piano çalmaq, bilyard oynamaq və başqa əyləncəli oyunların təşkilindən sonra uşaqlar nahara yollandılar. Lisey rəhbərliyinin valideynlərlə görüşü onların Lisey haqqında bilgilərini daha da genişləndirdi. Günün sonunda uşaqlara bir-birindən maraqlı hədiyyələr təqdim olundu və təmtəraqlı şəkildə yola salındı. Hədəf konseptinin – milli-mənəvi dəyərlərin və türkçülüyün geniş formada təbliğ olunduğu Lisey ilə tanışlıq məktəblilərin yaddaşında gözəl və unudulmaz təəssüratlar buraxdı.