Green Start Academy 21 fevral – Beynəlxalq Ana Dili günü münaibətilə təşkil etdiyi şeir müsabiqəsinin qaliblərini mükafatlandırdı. GSA-nın rəhbəri Aysel Rəsulzadə tədbiri giriş sözü ilə açaraq tarixi günlərdə təşkil etdikləri müsabiqələrin şagidlərin tariximizi və ədəbiyyatımızı dərindən mənimsəməsində, mütaliəyə həvəslərinin güclənməsində, ümumilikdə isə elm və təhsilə dərindən yiyələnməsində mühüm rola malik olmasından danışdı.
GSA-nın Müsabiqələrin təşkili üzrə layihənin rəhbəri Raifə Hidayətova qalibləri təbrik edərək məktəblilərin bu cür müsabiqələrdə aktivlik göstərdiklərini qeyd etdi və burada valideynlərə və müəllimlərə də vasitəçi olduqları üçün xüsusi minnətdarlığını ifadə etdi. Həmçinin müsabiqədə qaliblərin seçilməsində münsif olaraq iştirak edən Aysel Fikrət, Günay Bayramlı və Aygün Cəfərliyə də təşəkkürünü bildirdi.
Respublikanın bütün regionlarını əhatə edən müsabiqənin qalibləri – I yer Xəzər rayon Binə qəsəbəsi Ramin Sadıqov adına 136 saylı orta məktəbin 2-ci sinif şagirdi Yaqub Əliyev, II yer Masallı rayon Səfəralı Məmmədov adına Sərcuvar kənd tam orta məktəbinin 4-cü sinif şagirdi Sübhanə Abdullazadə, III yer Göyçay rayon 3 nömrəli tam orta məktəbin 1-ci sinif şagirdi Nuray Əliyeva Green Start Academy tərəfindən Diplom, Xan Nəşriyyatı tərəfindən kitablar və ofis ləvazimatları ilə təqdim olundu. Xan Nəşriyyatının direktoru Səbuhi Şahmursoy bu cür müsabiqələrin daha çox olmasını və Nəşriyyat olaraq mütaliənin inkişafı üçün hər zaman dəstəyə hazır olduqlarını bildirdi. Xan Nəşriyyatının baş redaktoru Cavid Qədir çıxış edərək Nəşriyyatın gələcək fəaliyyətindən və yaxın aylarda nəzərdə tutulan layihələr haqqında danışdı.
Sonda qaliblərin şeirləri dinlənildi və xatirə şəkli çəkdirildi.
