-
Green Start Academy və “Gənclərin Töhfəsi” İctimai Birliyinin təşkilatçılığı ilə 5 oktyabr – Ümumxalq Müəllimlər Günü münasibətilə Xəzər Universitetində elmi-praktik konfrans keçirildi. Konfransı açıq elan edən Green Start Academy-nin rəhbəri Aysel Rəsulzadə bu tədbiri müəllimlər üçün kiçik bir hədiyyə kimi düşünərək, həyata keçirdiklərini bildirdi: “Məqsədimiz milli-mənəvi dəyərlərimizə hörmət etməklə, sağlam ruhlu və müasir düşüncəli şəxsiyyət yetişdirməyə yardımçı olmaqdır. Buna görə də hər zaman cəmiyyətin əsas təhsil və tərbiedici qüvvəsi olan müəllim və valideynlər üçün seminar və təlimlər keçirir, təhsil, tərbiyə və psixoloji mövzularda onları maarifləndirməyə çalışır, eyni zamanda valideynlərin övladları, müəllimlərin isə şagirdləri ilə birlikdə asudə və faydalı vaxt keçirməsinə şərait yaradırıq”.
“Gənclərin Töhfəsi” İctimai Birliyinin sədr müavini və hüquqşunası Rəşad Nəbiyev Birliyin fəaliyyəti haqqında məlumat verərək, hər zaman gənc nəslin təlim-tərbiyəsində və inkişafında var gücləri ilə çalışdıqlarını qeyd etdi.
Konfransda ölkəmizdə təhsil sahəsində öz sözünü deyən dəyərli ekspertlər – Əməkdar elm xadimi, professor, ictimai-siyasi xadim, Təhsil Nazirliyi yanında İctimai Şuranın üzvü Şahlar Əsgərov, Təhsil Nazirliyi yanında İctimai Şuranın üzvü, təhsil eksperti Nadir İsrafilov, filologiya üzrə fəlsəfə doktoru dosent, publisist, Hədəf liseyinin təsisçisi Şəmil Sadiq, “İlin ən yaxşı müəllimi” müsabiqəsinin qalibi, metodist və təlimçi İlahə Rəhimova, Psixoqamma Praktik Psixologiya Mərkəzinin rəhbəri, pedaqoq və psixoloq Limunət Əmrahlı, “Gənc müəllim” şəbəkəsinin və “Müəllim liderliyi” layihəsinin rəhbəri, Qapıçıməhəllə kənd məktəbinin tarix müəllimi Həbib Əlizadə müəllim və şagird münasibətlərindən bəhs edən mövzularda məruzə etdilər.
Konfransın səliqəli abu-havası, təlimçilərin fikirlərini səmimi paylaşması tədbir iştirakçılarına xoş ovqat bəxş etdi. Bir sözlə, tədbir müəllimlər üçün əsl bayram hədiyyəsi oldu.
Sonda müəllimlərə günün xatirəsi olaraq Sertifikat təqdim olundu və xatirə şəkli çəkdirildi.
